Uwch Wyddonydd Ymchwil a Datblygu, STG Aerospace

Helo, Andrew ydw i, ac rwy’n gweithio fel uwch wyddonydd ymchwil a datblygu ar gyfer STG Aerospace yng Nghwmbrân, de Cymru.

Beth mae uwch wyddonydd ymchwil a datblygu yn ei wneud?

Rwy’n gweithio yn yr Uned Fusnes Systemau Marcio Allanfeydd Argyfwng sy’n datblygu arwyddion a marciau ffoto-ymoleuol ar gyfer llwybrau. Mae gen i nifer o rolau yn y busnes, gan gynnwys:

• gwerthuso ac ymchwilio i ddeunyddiau neu dechnolegau newydd.
• rheoli prosiectau ar gyfer datblygu cynnyrch newydd.
• darparu cymorth i ochr weithredol y cwmni.
• cynnal cyfarfodydd ag OEMs (Gwneuthurwyr yr Offer Gwreiddiol) fel Boeing ac Airbus.
• rheoli portffolio Eiddo Deallusol y cwmni.

Sut mae eich gwaith yn effeithio ar y byd o’n cwmpas? 

Mae’r diwydiant awyrofod yn ymddiried yn STG Aerospace ar gyfer eu systemau goleuo cabanau a marcio allanfeydd argyfwng. Rwyf wedi bod yn aelod o dîm ymchwil a datblygu ers wyth mlynedd, ac rydym wedi datblygu systemau allanfeydd argyfwng STG, gan ganolbwyntio ar y canlynol:

• cynnal a chadw safonau uchel o ran diogelwch ar gyfer teithwyr awyrennau.
• lightweight products to lower emission from fuel consumption.
• cynnyrch ysgafn i leihau allyriadau wrth ddefnyddio tanwydd.
• gwell estheteg ar gyfer profiad y teithwyr.

Hefyd, rydym yn bwriadu defnyddio rhagor o ddeunyddiau mwy cynaliadwy a pharhau i wella llywodraethiant amgylcheddol a chymdeithasol y cwmni.

 

 

 

 

Beth yw eich diwrnod cyffredin? 

Mae pob diwrnod yn wahanol. Un diwrnod, gallwn fod yn profi sut mae ein cynnyrch yn gweithio o dan y dŵr yn ei labordy. Y diwrnod nesaf, gallwn fod yn ateb cwestiwn technegol gan gwsmer.

Beth ydych chi’n ei hoffi am eich swydd? 

Yr amrywiaeth.  Mae yna rywbeth newydd a chyffrous i’w wneud bob amser. Fel busnes bach a chanolig ystwyth, rydym yn gallu ymateb i ofynion cwsmeriaid yn gyflym, felly mae’n bwysig bod yn hyblyg iawn gyda blaenoriaethau a galwadau sy’n newid. Mae gwybod bod y gwaith ymchwil rwyf yn ei wneud yn cael effaith uniongyrchol ar gynnyrch yn rhoi boddhad i mi. Mae eu gweld ar awyrennau a gwybod fy mod wedi cyfrannu at rywbeth sy’n helpu i gadw pobl yn ddiogel yn deimlad gwych.

Pam wnaethoch chi ddewis cemeg? Beth sy’n eich cymell? 

Mae cemeg yn cwmpasu amrywiaeth mor eang o bynciau ac mae’n darparu sgiliau hanfodol mewn ymchwil a meddwl yn feirniadol. Mae’r rhain i gyd yn bwysig wrth ddatblygu cynnyrch newydd ar gyfer y diwydiant awyrofod.

Rwyf wir yn mwynhau cydweithio a datrys problemau. Gweld beth yw’r heriau i’r cwsmeriaid a meddwl am ateb hyfyw – dyna sy’n fy nghymell i.

Sut y daethoch chi o hyd i’ch swydd? Sut gwnaeth eich cymhwyster eich helpu i gyrraedd y fan honno?

Roeddwn i’n gweithio fel cydymaith ymchwil ôl-ddoethurol ym Mhrifysgol Caerdydd, ac roedd fy nghontract ar fin dirwyn i ben. Roedd STG wrthi’n sefydlu canolfan ymchwil a datblygu yn ne Cymru ac yn hysbysebu am gemegydd i sefydlu a rhedeg labordy newydd. Roedd fy PhD mewn cemeg wedi fy helpu gyda’m cais, gan ei fod yn dangos bod gen i wybodaeth dechnegol mewn maes perthnasol a fy mod yn meddwl mewn ffordd drefnus ac wedi arfer gweithio ar brosiectau manwl.

Pa sgiliau sydd eu hangen arnoch i wneud eich swydd? 

Mae’r sgiliau sy’n angenrheidiol ar gyfer fy swydd yn cynnwys datrys problemau, trin data, ysgrifennu adroddiadau, cyfleu a rhannu canlyniadau, rheoli amser, bod yn hyblyg wrth ddelio â blaenoriaethau sy’n newid a gweithio o dan bwysau i gwrdd ag amserlenni. Fel rwyf wedi’i ddweud eisoes, mae STG yn gwmni bach ac mae’n hanfodol bod gennych amrywiaeth o sgiliau.

Pa gyngor fyddech chi’n ei roi i berson ifanc sy’n ystyried gyrfa yn eich maes? 

Mae modd trosglwyddo’r sgiliau rydych yn eu datblygu mewn cemeg i amrywiaeth eang o swyddi yn y diwydiannau gwyddoniaeth a pheirianneg (a diwydiannau eraill hefyd). Gall cefndir ym maes cemeg arwain at swyddi mewn technolegau o’r radd flaenaf mewn gwyddoniaeth ac ymchwil, yn ogystal â rolau y tu allan i’r labordy. Bydd cwmnïau’n aml yn eich ffafrio oherwydd bod gennych gefndir cadarn, hyd yn oed os nad yw’r swyddi rydych yn ymgeisio amdanynt yn berthnasol yn uniongyrchol – er enghraifft, rheoli prosiectau.

Beth yw eich cynlluniau ar gyfer y dyfodol? 

Wrth i ni ysgwyddo heriau ehangach o ran arloesi, hoffwn arwain ar brosiectau newydd sy’n gwthio’r tîm i ddatblygu atebion sy’n sicrhau ein bod yn parhau i fod yn arweinwyr yn y farchnad. Wrth i’r tîm dyfu a datblygu, ac wrth i’n portffolio amrywio, hoffwn fod yn rhan o’r broses o wneud penderfyniadau sy’n rhoi hwb ymlaen i ni.

Eisiau gwybod mwy? 

• Edrychwch ar eich opsiynau astudio, siarad â chynghorydd gyrfa a chwilio am brofiad gwaith . 

• Rhagor o wybodaeth am STG Aerospace.   

• Tarwch olwg ar Fforwm Awyrofod Cymru  a’r corff masnach Aerospace, Defence & Security.

Andrew Hallett, uwch wyddonydd ymchwil a datblygu, STG Aerospace.

Cyhoeddwyd Medi 2022