Uwch Guradur

Helo, Tom ydw i ac rydw i’n uwch guradur mwynyddiaeth ar gyfer Amgueddfa Cymru, gan weithio’n benodol yn Amgueddfa Genedlaethol Caerdydd. 

Beth mae uwch guradur yn Amgueddfa Cymru yn ei wneud? 

Mae fy nghwmni’n gofalu am gasgliad o greigiau a mwynau cenedlaethol Cymru, gan ddarparu sesiynau allgymorth, arddangosfeydd a dysgu i’r cyhoedd. 

Sut mae eich gwaith yn effeithio ar y byd o’n cwmpas?

Drwy astudio creigiau a mwynau Cymru, gallwn weld sut mae Cymru wedi newid drwy amser daearegol a darparu gwybodaeth am yr adnoddau sydd wedi cael eu cloddio ac y gellid eu cloddio o bosibl yn y dyfodol. 

Beth yw eich diwrnod cyffredin? 

Amrywiol. Mae pob diwrnod yn wahanol ac yn cynnwys cymysgedd o weithgareddau curadu (labelu a nodi sbesimenau o mwynau mewn cronfa ddata); ymchwil (darllen am fwynyddiaeth/daeareg, dadansoddi sbesimenau gan ddefnyddio cyfarpar o’r radd flaenaf – diffreithiad pelydr X – ac ysgrifennu papurau gwyddonol); ateb ymholiadau; ysgrifennu a chyflwyno sgyrsiau; ysgrifennu arddangosfeydd; ac, wrth gwrs, mynychu cyfarfodydd a gwirio e-byst. 

Pam wnaethoch chi ddewis cemeg? Beth sy’n eich cymell? 

Yn eironig, wnes i ddim astudio cemeg yn lefel A, ond dylwn i fod wedi. Mae’r rhan fwyaf o fy ngwybodaeth yn deillio o fy ngradd mewn daeareg neu o ddysgu fy hun. Erbyn hyn, rydw i wrth fy modd â fformiwlâu cemegol mwynau ac mae gen i lawer o wybodaeth am fwynyddiaeth. Rhyfeddodau mwynau sy’n fy nghymell. 

Beth ydych chi’n ei hoffi am eich swydd? 

Popeth: gweithio gyda’r pethau rydw i’n eu hoffi – mwynau – a gallu adnabod sylweddau anhysbys o fymryn bach o bowdr. 

Pa sgiliau sydd eu hangen arnoch i wneud eich swydd? 

Mae angen i chi gael diddordeb brwd yn y pwnc, mwynhau gwaith maes, a gallu dysgu a chofio sut mae adnabod gwahanol fwynau, ysgrifen daclus (ar gyfer labelu’r sbesimenau), datrys problemau a chael meddwl fforensig (i adnabod mwynau), ond hefyd bod yn gyfforddus â thasgau cyffredin fel ysgrifennu labeli a rhoi gwybodaeth mewn cronfa ddata. 

Sut y daethoch chi o hyd i’ch swydd? 

Fe ddes i o hyd i fy swydd drwy argymhelliad gan fy nhiwtor (meistr) yn Ysgol Mwyngloddiau Camborne – doeddwn i ddim yn chwilio am swydd ond fe wnaeth fy annog i ymgeisio. 

Sut gwnaeth eich cymwysterau eich helpu i gael eich swydd? 

Mae fy nghefndir daearegol yn deillio o fy nghymwysterau (Gradd gydanrhydedd BSc mewn daearyddiaeth/daeareg a MSc mewn daeareg mwyngloddio), ond rydw i wedi casglu gwybodaeth am fwynau drwy archwilio safleoedd mwyngloddio ac ardaloedd daeareg yn fy amser sbâr. 

Pa gyngor fyddech chi’n ei roi i berson ifanc sy’n ystyried gyrfa yn eich maes? 

Mae gen i ddiddordeb mawr mewn mwynyddiaeth. Nid oes gan lawer o bobl, heb sôn am ddaearegwyr, yr wybodaeth i adnabod mwynau. Rydw i wedi dysgu, er mwyn gallu adnabod mwynau, mae angen i chi deimlo eu dwyster a gweld eu disgleirdeb, sydd ddim yn cael ei gynrychioli mewn lluniau. Nid yw cyrsiau’n dysgu’r profiad a’r wybodaeth hon – er eu bod nhw’n helpu – mae’n gofyn am ymroddiad a brwdfrydedd am y pwnc. Dyma, i mi, sy’n gwahaniaethu rhwng mwynolegwyr go iawn. 

Nid oes llawer o swyddi mwynolegwyr mewn amgueddfeydd – dim ond mewn amgueddfeydd cenedlaethol fel arfer, felly mae angen i chi wneud yn siŵr mai chi yw’r gorau. 

Beth yw eich cynlluniau ar gyfer y dyfodol? 

Rydw i’n arbenigo mewn mwynyddiaeth ac adnabod mwynau; yr unig opsiwn arall fyddai masnachu mwynau (sy’n golygu llawer o deithio o amgylch y byd) neu swydd ddadansoddi efallai. 

Eisiau gwybod mwy? 

• Edrychwch ar eich opsiynau astudio, siarad â chynghorydd gyrfa a chwilio am brofiad gwaith. 
• Tarwch olwg ar Gymdeithas yr Amgueddfeydd, Grŵp Curaduron Daeareg, Cymdeithas Daearegwyr, Amgueddfa Cymru ac Amgueddfa Genedlaethol Caerdydd. 

Tom Cotterell, uwch guradur Amgueddfa Cymru. 

Cyhoeddwyd Medi 2022