Cemeg feintiol | Adolygu fy nysgu

Mae’r adnodd hwn yn cynnwys tri fersiwn o daflen waith ar gemeg feintiol: un wedi’i sgaffaldio, un wedi’i sgaffaldio’n rhannol ac un heb ei sgaffaldio. Defnyddiwch y taflenni gwaith i nodi camsyniadau a bylchau yng ngwybodaeth y dysgwyr ar ôl addysgu’r pynciau hyn neu cyn ailedrych arnynt. Dysgwch ragor am sut mae defnyddio’r adnodd hwn neu lawrlwythwch y taflenni gwaith nawr.

Pynciau’r cwricwlwm

Mae’r taflenni gwaith cemeg feintiol yn ymdrin â’r pynciau canlynol:

• atomau a moleciwlau
• elfennau a chyfansoddion
• adweithyddion a chynhyrchion mewn hafaliad cemegol
• fformiwla gemegol syml
• deddf cadwraeth màs
• ysgrifennu hafaliadau geiriau syml
• ysgrifennu hafaliadau symbolau cytbwys syml
• cyfrifo màs adweithydd neu gynnyrch mewn adwaith cemegol gan wybod yr holl fasau eraill sy’n adweithio.

Os bydd y dysgwyr yn ateb cwestiynau am y pynciau hyn yn llwyddiannus, gallant roi cynnig ar y cwestiynau estyn. Mae’r rhain yn cynnwys:

• defnyddio’r tabl cyfnodol i ganfod masau atomig cymharol elfennau a enwir
• cyfrifo màs fformiwla cymharol.

Sut mae defnyddio’r adnodd hwn

Gellir defnyddio’r taflenni gwaith mewn sawl ffordd:

• i asesu gwybodaeth y dysgwyr ar ddechrau neu ddiwedd cyfnod o addysgu. Parwch lefel y daflen waith ag anghenion cymorth y dysgwyr;
• i asesu gwybodaeth yn ystod cyfnod o addysgu ar ôl i’r dysgwyr gwblhau’r pwnc perthnasol;
• fel rhan o’r adolygu;
• fel ymarfer gloywi ar gyfer athrawon neu bobl nad ydynt yn arbenigo yn y pwnc.

Sgaffaldio

Mae tair lefel o gymorth ar gael, gan ddarparu opsiynau yn dibynnu ar anghenion cymorth amrywiol y dysgwyr. Darperir fersiwn y gellir ei olygu o bob taflen waith, gan roi rhagor o gyfleoedd i addasu’r adnoddau i ddiwallu anghenion dysgu unigolion. Hefyd, mae modd cynyddu lefel y taflenni gwaith a ddefnyddir, wrth i’r dysgwyr symud ymlaen drwy eu cwricwlwm.

Dysgu annibynnol a metawybyddiaeth

Mae’r dudalen ‘Beth ydw i’n ei ddeall?’ yn cael ei chynnwys ym mhob taflen waith. Mae’r dysgwyr yn cael eu hannog i ddatblygu sgiliau dysgu annibynnol a gallant ddefnyddio eu myfyrdod fel canllaw ar gyfer adolygu. Bydd yr adborth hefyd yn eich helpu i adnabod meysydd y mae angen rhoi sylw iddynt gyda’r dosbarth cyfan.

Atebion

Mae’r canllawiau i athrawon yn rhoi atebion enghreifftiol ar gyfer pob taflen waith, yn ogystal ag arweiniad ar gamsyniadau cyffredin y dysgwyr. Gall y dysgwyr ddefnyddio’r atebion enghreifftiol i hunanasesu neu i asesu eu cyd-ddysgwyr.