Sut mae lluniadu diagramau dot a chroes

No comments

Anogwch eich myfyrwyr gyda’r dull cam wrth gam hwn ar gyfer bondio cofalent

Modelau moleciwl cartŵn a diagramau plisgyn electronau

Source: © Dan Bright

Ar ôl iddynt feistroli diagramau ffurfwedd electronau, dangoswch i’ch dysgwyr sut maent yn gallu eu haddasu i ddangos adeiledd a bondio mewn cyfansoddion cofalent ac ïonig. Mae’r diagramau adeileddol hyn yn darlunio electronau’r plisgyn allanol, neu’r electronau falens, yn unig. Eu henw yw diagramau dot a chroes. Mae electronau o wahanol atomau yn defnyddio symbolau eiledol, dot a chroes fel arfer, i ddangos o ba atom daw’r electronau.

Dewch i ni edrych yn fanylach ar rai cyfansoddion sy’n cynnwys nitrogen. Cofiwch fod gan nitrogen bum electron yn ei blisgyn allanol.

Sut mae lluniadu diagram dot a chroes ar gyfer amonia

Mewn NH₃, neu amonia fel mae’n cael ei alw’n gyffredin, mae nitrogen yn ffurfio tri bond cofalent sengl gyda thri atom hydrogen.

Wrth i chi ddysgu sut mae lluniadu diagramau dot a chroes, mae’n ddefnyddiol dechrau gyda rhywbeth sydd eisoes yn gyfarwydd i chi: diagramau ffurfwedd electronau. Brasluniwch y diagramau ffurfwedd electronau ar gyfer pob un o’r atomau

Lluniadwch blisgyn allanol pob atom. Mae’n syniad da lluniadu’r electronau mewn parau ond cofiwch ddefnyddio pensil, oherwydd efallai y bydd yn rhaid i chi symud yr electronau o gwmpas i ffitio’r adeiledd. Nid oes angen i chi roi cylch o amgylch y symbol ar gyfer y niwclews

Trefnwch yr atomau fel bod yr electronau falens yn cwblhau plisg allanol yr holl atomau mewn moleciwl cofalent syml. Wrth i chi ddysgu, lluniadwch bob atom ar ddarn bach o bapur er mwyn i chi allu eu had-drefnu’n hawdd

Lluniadwch y diagram dot a chroes cyflawn. Yma, rydym wedi newid yr electronau ar yr atomau hydrogen i fod yn ddotiau. Gallwch newid y dotiau i fod yn groesau, ac fel arall, mewn diagramau syml neu ddefnyddio lliwiau neu symbolau eraill ar gyfer diagramau mwy. Mae’r diagram dot a chroes hwn yn dangos y plisg allanol yn cyffwrdd

Y dull hwn yw’r hawsaf ar gyfer bondiau cofalent sengl gan nad oes llawer o le ar gyfer lluniadu llawer o barau o electronau lle mae plisg yr atomau’n cyffwrdd.

Lawrlwytho’r adnoddau

Lawrlwytho’r Cyfan

Poster ffeithlun a thaflen ffeithiau

Arddangoswch y poster yn eich ystafell ddosbarth neu ar daflunydd. Neu gallwch ei argraffu a’i ddefnyddio fel taflen i’w dosbarthu.
- Y poster ar ffurf pdf
- Y daflen ffeithiau ar ffurf MS Word neu pdf
Covalent bonding tiles worksheet

Defnyddiwch y daflen ffeithiau gysylltiedig a’r daflen waith i gael eich myfyrwyr i ymarfer diagramau dot a chroes. Ewch i’r adnodd cysylltiedig i gael rhagor o wybodaeth am sut mae defnyddio’r Teils bondio cofalent
- Y daflen waith teils bondio cofalent i fyfyrwyr ar ffurf MS Word neu pdf
- Yr atebion a’r nodiadau i athrawon ar gyfer teils bondio cofalent ar ffurf MS Word neu pdf

Gweld a lawrlwytho rhagor o ffeithluniau

Sut mae lluniadu bondiau dwbl a thriphlyg

Mae’r dull cyntaf (cefndir glas) yn ddefnyddiol ar gyfer bondiau dwbl a thriphlyg gan ei fod yn rhoi mwy o le i luniadu electronau. Mae’r ail ddull (cefndir pinc) yn ddefnyddiol ar gyfer gwneud yn siŵr eich bod wedi lluniadu’r nifer cywir o electronau ym mhlisgyn allanol pob atom.

Mae nitrocsyl yn cynnwys bond cofalent sengl rhwng hydrogen a nitrogen, a bond cofalent dwbl rhwng nitrogen ac ocsigen

Lluniadwch y diagram dot a chroes yn dangos y plisg allanol yn gorgyffwrdd. Yna lluniadwch yr electronau cydranedig y tu mewn i’r rhan sy’n gorgyffwrdd

Mae nwy nitrogen yn digwydd yn naturiol fel moleciwl deuatomig. Mae’r bond rhwng y ddau atom nitrogen yn fond triphlyg

Eto, lluniadwch y diagram dot a chroes yn dangos y plisg allanol yn gorgyffwrdd. Ond y tro hwn, lluniadwch yr electronau ar y llinellau yn hytrach nag yn y gofod rhyngddynt

Hoffech chi gael canllaw cam wrth gam arall ar luniadu bondiau? Edrychwch ar yr erthygl hon sy’n cynnwys adnoddau ar luniadau diagramau dot a chroes ar gyfer bondio ïonig.