Sut i luniadu diagramau ffurfwedd electronau

No comments

Rhowch hwb i hyder eich myfyrwyr 14–16 oed wrth luniadu diagramau ffurfwedd electronau gyda’r camau hawdd eu dilyn hyn

Mae diagram ffurfwedd electronau yn fodel sy’n darlunio safle electronau wrth iddynt orbitio niwclews atom. Cynrychiolir yr electronau gan ddotiau neu groesau ac maent wedi’u lleoli mewn lefelau egni, neu ‘blisg’, o amgylch y niwclews canolog. Gelwir hwn weithiau’n fodel Bohr, neu’n fodel ‘cysawd yr haul’.

Lawrlwytho’r adnoddau

Lawrlwytho’r Cyfan

Poster ffeithlun a thaflen ffeithiau

Arddangoswch y poster yn eich ystafell ddosbarth neu ar daflunydd. Neu gallwch ei argraffu a’i ddefnyddio fel taflen i’w dosbarthu.
- Y poster ar ffurf pdf
- Y daflen ffeithiau ar ffurf MS Word neu pdf
Taflenni gwaith Ffwdan ffurfwedd

Defnyddiwch y taflenni gwaith cysylltiedig i addysgu eich myfyrwyr i luniadu diagramau ffurfwedd
- Ffwdan ffurfwedd – taflen waith i fyfyrwyr fe MS Word neu pdf
- Atebion Ffwdan ffurfwedd fel MS Word neu pdf

Gweld a lawrlwytho rhagor o ffeithluniau

Neils Bohr oedd y person cyntaf i awgrymu’r syniad bod electronau’n orbitio’r atom mewn plisg sefydlog, neu lefelau egni, a hynny yn 1913. Arsylwodd Bohr mai dim ond ar donfeddi penodol yr oedd ffrwydradau o egni’n allyrru o atomau hydrogen, a’r rheini’n weladwy fel golau. Awgrymodd fod hyn oherwydd bod electronau’n symud rhwng lefelau egni yn hytrach na’u bod wedi eu gwasgaru ar hap o amgylch y niwclews. Dyfarnwyd gwobr Nobel iddo am ei waith.

Gwnaeth Bohr argraff ar ei gyd-wyddonydd Rutherford, a ddarganfyddodd niwclews yr atom, ond ni lwyddodd i ddarbwyllo JJ Thomson, y cafodd ei fodel ‘pwdin Dolig’ o’r atom ei ddisodli gan fodel Rutherford, ac yna gan fodel Bohr.

Ym model Bohr, mae rhai rheolau a fydd yn eich helpu i luniadu diagramau cywir.

Rhaid i electronau fod yn y plisgyn isaf sydd ar gael, yr un agosaf at y niwclews.
Uchafswm yr electronau a all lenwi pob plisgyn yw:
- dau yn y plisgyn cyntaf,
- wyth yn yr ail blisgyn,
- wyth yn y trydydd plisgyn.
Mae gan galsiwm, yr 20^fed elfen, ddau electron arall sy’n mynd i’r pedwerydd plisgyn.

Yn y nodiant llaw-fer ar gyfer ffurfwedd electronau, gellir ysgrifennu nifer yr electronau ym mhob plisgyn yn hytrach na’u lluniadu. Caiff pob plisgyn ei wahanu gan atalnod llawn neu goma. Ar gyfer nitrogen, byddai hyn yn 2.5 neu 2,5 ac ar gyfer calsiwm byddai hyn yn 2.8.8.2 neu 2,8,8,2.

Oeddech chi’n gwybod …?

Mae trefniant electronau elfen yn dweud wrthych ymhle y mae’r elfen wedi’i lleoli yn y tabl cyfnodol. Mae nifer y plisg yn dangos ym mha gyfnod, neu res, y mae’r elfen ac mae nifer yr electronau yn y plisgyn allanol yn dangos ym mha grŵp y mae’r elfen.

Sut i luniadu diagram ffurfwedd electronau

Dewch o hyd i’r elfen yn y tabl cyfnodol. Mae’r rhif atomig yn dweud wrthych beth yw cyfanswm yr electronau y mae angen i chi eu lluniadu. Er enghraifft, mae gan botasiwm 19 electron

Lluniadwch gylch bach ac ysgrifennu’r symbol yn y canol. Mae hwn yn cynrychioli’r niwclews

Lluniadwch gylch o amgylch y niwclews. Dyma’r plisgyn electronau cyntaf

Ychwanegwch hyd at ddau electron at y plisgyn electronau cyntaf. Fel arfer, mae electronau’n cael eu cynrychioli gan ddot neu groes

Lluniadwch gylch arall o amgylch y plisgyn cyntaf. Dyma’r ail blisgyn

Ychwanegwch hyd at wyth electron at yr ail blisgyn

Lluniadwch gylch arall o amgylch yr ail blisgyn electronau. Dyma’r trydydd plisgyn

Ychwanegwch hyd at wyth electron at y trydydd plisgyn

Lluniadwch y cylch olaf o amgylch y trydydd plisgyn. Dyma’r pedwerydd plisgyn electronau

Ychwanegwch hyd at ddau electron at y pedwerydd plisgyn electronau. Ar gyfer potasiwm, dim ond un electron sy’n cael ei ychwanegu at y plisgyn hwn

Yn awr, lluniadwch yr 20 elfen gyntaf

Defnyddiwch y camau uchod i luniadu diagramau ffurfwedd electronau o’r 20 elfen gyntaf

Gall safle’r electronau ddibynnu ar yr hyn y mae angen i chi ei luniadu nesaf

Hoffech chi gael canllawiau cam wrth gam eraill ar luniadu bondiau? Edrychwch ar yr erthyglau hyn sy’n cynnwys adnoddau ar luniadu diagramau dot a chroes ar gyfer: